Parimet e komunikimit ndërmjet nxënësve, mësuesve dhe drejtuesve të shkollës "Flatrat e Dijes": respekt, tolerancë, mirëkuptim dhe vetëkontroll.
1. Të mos jetë aspak fyes
- Të jetë i çliruar nga fjalët, shprehjet, qëndrimet dhe veprimet që bien ndesh me normat e pranuara bashkërisht.
- Të mos fyejë askënd dhe asnjëherë nëpërmjet fjalëve, shprehjeve, tonit apo ideve përçmuese.
- Të shprehë qëndrime që tregojnë kulturë dhe respekt për bashkëbiseduesin dhe dëgjuesit.
- Të zhvishet nga frazat dhe fjalët parazitare që burojnë nga gjendje emocionale negative.
- T'i drejtohemi njëri-tjetrit sipas pozicionit të secilit në shkollë: mësues, drejtor, administrator etj.
2. Të respektojë individualitetin e gjithsecilit
- Të mos jetë diskriminues.
- Të jetë i natyrshëm dhe i lirshëm, pa cënuar apo lënduar individin, duke respektuar tërësisht dinjitetin e tij.
- Të mos cënojë intimitetin e jetës dhe personalitetin e individit.
3. Të mos çojë në konflikte midis personave
- Të edukojë tolerancën dhe shprehitë e nevojshme për pjesëmarrjen në një debat.
- Të synojë shmangien e konflikteve dhe, kur ato lindin, zgjidhjen e drejtë të tyre.
- Të zhvishet nga frazat, idetë dhe qëndrimet ironizuese që cënojnë personalitetin.
4. Të shërbejë për mirëkuptim dhe bashkëpunim
- Të krijojë gjendje emocionale pozitive.
- Të forcojë mirëkuptimin dhe miqësinë midis pjesëmarrësve.
5. Të jetë demokratik
- Të mos jetë diktues, por bindës, larg qëndrimeve autoritare.
- Të mbartë dhe të transmetojë vlera demokratike si humanizmi, toleranca, gatishmëria për dialog dhe vetëkontrolli.
- Të jetë i çlirët dhe i vërtetë, jo i shtirur.
6. Të shprehë dhe të përforcojë vetëkontrollin
- Të demonstrojë dhe të edukojë shprehitë e nevojshme për vetëkontroll.
- Të parandalojë dhe të zbusë qëndrimet emocionale negative.
Kjo aftësi edukohet gradualisht te të gjithë nxënësit dhe duhet të karakterizojë drejtuesit dhe mësuesit e shkollës.